ძალიან მიყვარს პატარა, ერთი ამოსუნთქვით მოსარბენი, საყვარელი ადგილები.

იცით ეს რას ნიშნავს? აი, სამ სააათში რომ მთელ კუნძულს მოივლი მაგას.

მალტა! გადაწყვეტილება წასვლაზე უადვილესი მისაღებია. თუმცა სურვილი და შესაძლებლობა ყოველთვის არ ემთხვევა ერთმანეთს და გამოსავალი აქაც არსებობს. „საგზურის“ მგზავრებს ეძლევათ შესაძლებლობა უპროცენტო განვადებით ისარგებლონ.

ტრანსფერი მალტას აეროპორტიდან ცენტრამდე, 1 ადამიანზე, დაახლოებით 4 ევრო ღირს. ამით ყველაფერი ნათქვამია, მალტაზე დასვენების მთავარი კომფორტიც ხომ სწორედ ეს არის: ფასების სამოთხეა! რაც ესეთი იშვიათობაა ხმელთაშუა ზღვის კურორტებზე.

აქ ტურისტების რაოდენობა არასდროს წყდება. ან რანაირად შეიძლება შეწყდეს? დაუჯერებელი სილამაზეა. ფირუზისფერი წყალი, მარჯნის რიფები და კუძნულები, რომელთა ნაპრალებში ნავები დაცურავენ.

მხიარული კუნძული ზღაპრების წიგნიდან  – ასეთია მალტა თავისი მოყვითალო ქვისგან აგებული სახლებით, რომლებსაც ცისფერი და მალინისფერი აივნები აქვთ. უვიწროვეს ქუჩებზე, მზის სხივები ძლივს აღწევს, თუმცა ქუჩის ბოლოს პატარა მოედნებზე თაკარა მზეა! რა ჯობია აქ ყავის დალევას ე.წ. „გადასავარდნ ადგილებში“, ბორცვებზე შემაღლებულ კაფეებში, სადაც ზემოდან დაჰყურებ კალმარებით სავსე გაშლილ, კამკამა ზღვას.

პირველი ემოცია ესეთია: ვახ, თურმე აქაურობა ყველაფერთან ერთად ცოცხალი მუზეუმია. ასე რომ მხოლოდ საცურაო კოსტიუმებს ნუ გაიყოლებთ. მოსახერხებელ ბოტასებშიც ჩაყავით ფეხი, რამეთუ ვალეტა, მალტას დედაქალაქი, ხელოვნების ნიმუშია, სადაც არასდროს მოგბეზრდებათ ბოდიალი.

ვალეტა ყვითელია. თან დაძველებული, Washed ყვითელი. ჩახუჭუჭებული აივნები იმდენად ახლოსაა, რომ მეზობელი ხელს ჩამოგართმევს. ამიტომაც მალტა ჩემთვის „გლამურული“ კუნძული კი არ არის (ეს სიტყვა ისედაც დიდად არ მიყვარს), არამედ ზუსტად ისეთია, როგორც ეს ისტორია დავიწყე: პატარა და ძალიან, ძალიან საყვარელი.

ვალეტას ისტორიულ ნაწილში სეირნობისას Saint John’s Co-Cathedral მივადექი, რომელიც მე16 საუკუნეში აიგო. ულამაზეს ტაძარს, ხმაურიანად ნუ დაათვალიერებთ. ტაძარი მოქმედია და ღვთისმსახურების დროს აუცილებლად დაიმსახურებთ შენიშვნას, როგორც ეს მე დავიმსახურე. სხვადასხვა რელიგიურ რიტუალებს შორის ჯვრისწერას ვერასდროს ნახავთ. ზუსტად არ ვიცი რატომ არის ჯვრისწერა აკრძალული ამ ტაძარში. თუ წახვალთ შეგიძლიათ თავად გაარკვიოთ მიზეზი. ტაძარი შიგნიდან ოქროსფრადაა მოჩუქურთმებული. მას რაინდების ტაძარს ეძახიან, თუმცა თეთრ რაშზე ამხედრებულ, ბუმბულით შემკობილ მუზარადიან რაინდს დიდად ნუ დაელოდებით, არამგონია ჩამოაიაროს.

და მაინც, მალტის ყველაზე დიდი სანახაობა კარავაჯოა.

იტალიელი ფერმწერი, თურმე მალტას ხშირად სტუმრობდა და ამ სტუმრობით კუნძულმაც ძალიან იხეირა. სახვითი ხელოვნების ეროვნულ მუზეუმში კარავაჯოს „იოანე ნათლისმცემლის თავისკვეთა“ ინახება, რომელსაც ტურისტები ყოველ წელს აწყდებიან. არ ვიცი რატომაა ასეთი მომნუსხველი ორიგინალს რომ უყურებ. სულაც არაა საჭირო ხელოვნებათმცოდნე იყო. კარავაჯო ჩემნაირ „გაუვარჯიშებელ“ თვალსაც ატყვევებს.

იქვეა ყველაზე ძველი კაფე „გორდინა“, სადაც ფანტასტიური პუდინგი ვჭამე. ეს ყველაზე ძველი თავშეყრის უგემრიელესი ადგილი, 1837 წლით თარიღდება. ანუ ილია ჭავჭავაძის დაბადების წელს აქ კაფე გახსნილა.

კარგია აქ ყოფნა, მაგრამ დიდხანს ნუ ჩამოჯდებით. მალტაზე ბევრი რამაა დასათვალიერებელი. მათ შორის, კუნძულის თეატრი, რომელიც ერთ ერთი ყველაზე ძველი თეატრია მსოფლიოში. ამბობენ, რომ აქ განსაკუთრებული აკუსტიკაა, რაც სცენის ქვეშ მოთავსებული წყლით სავსე ცისტერნების დამსახურებაა.

პრეზიდენტის სასახლე თუ გინდათ ნახოთ, კუნძულის ცენტრალურ ნაწილში მოგიწევთ გასეირნება. სასახლე, რომლის მთავარი მაცხოვრებელი ქალი პრეზიდენტია, წმინდა ანტონის ულამაზეს ბაღში მდებარეობს. ბაღიც ულამაზესია! სავსე სრულიად წარმოდგენელი, ეგზოტიკური მცენარეებით, ხეებით და აუზში მოცურავე კუებით.

საღამოობით აუცილებლად გაისეირნეთ რომელიმე ნავსადგურში, რომელიც მალტაში უამრავია. ძველ ნავებზე მეთევზეებს ნახავთ. ზოგს აკიმარებს, ზოგი ფუტკარივით მუშაობს. მათი საქმიანობა მამიდან შვილზე გადადის. ეს ნავებიც ბაბუებისგან ერგოთ მემკივიდრეობით. თევზის ბიზნესი საკმაოდ სარფიანია. ამ იაფ ქვეყანაში ყველაზე მეტად სწორედ თევზი ფასობს.

ქალაქები ისეა ერთამანეთთან შეერთებული, როგორც ქუჩები. ვალეტადან St.julian-ში ისე შეიძლება მოხვდე, ვერც მიხვდები რომ სხვა ქალაქში გადახვედი. მალტას სტუნდენტურ ქვეყანას უწოდებენ უამრავი სასწავლებლის გამო. ყველაზე მაგარი სასწავლო კურსები სწორედ აქაა.

ინგლისურის სწავლა თუ გინდათ, აქ ჩამოდით! ზღვაზე დასვენება თუ გინდათ აქ ჩამოდით! ისტორიული ძეგლების მონახულება თუ გინდათ – აქ ჩამოდით! და ვისაც ეს ყველაფერი ერთად აინტერესებს, ფაქტობრივად, აქაურობა ქერის ორმოა.

ქუჩები სავსეა სტუდენტებით, განსაკუთრებით კი St.julian-ი. ამიტომაცაა მალტაზე ასეთი ენერგია. სავსეა აქაურობა ბარებით, რესტორნებით და კლუბებით. შესაძლოა ბასიანის და ბერგჰაინის მსგავსი კლუბი ვერ ნახოთ, მაგრამ იპოვით ისეთ ადგილებს სადაც ნამდვილად შეძლებთ სასიამოვნო დროის გაატარებას. აქ არის როგორც ბიუჯეტური (სასტუმროები, რესტორნები, ბარები) ასევე ძვირადღირებული ადგილებიც.

როცა სიარული მოგბეზრდებათ, გაცურეთ.

ხმელთაშა ზღვაზე დაივინგი დაუჯერებელი გამოცდილებაა.

შეიძლება გული გაგისკდეს ისეთი სილამაზეა: რამდენი ფერი, რამდენი წყალმცენარე, რამდენი თევზი! წყლისქვეშ თუ არაფერი გესაქმებათ იახტით შეგიძლიათ ისეირნოთ. ცალკე დაქირავებულით, ან ჯგუფთან ერთად.

და ყველაზე, ყველაზე მთავარი – მზის ჩასვლის დროს, როცა მალტის მოძველებული სახლებს სტაფილოსფერი მზე დაეცემა, როცა მეთევზეები ძველ რადიოლას ჩართავენ და ნავსადგურებში სევდა დაისადგურებს  – ბორანში ჩახტით და სიცილიისკენ გაეშურებით.

სულ რამდენიმე საათში და სიცილიაში ხართ.

მაგრამ ამაზე შემდეგ კვირას მოგითხრობთ…